這幾冬，台文出版愈來愈興，鬧熱滾滾，對繪本、散文、現代詩到長篇小說、經典文學翻譯，成績攏誠顯目，甚至佇國際上唌人目。不而過，若欲予台語文出版品有影會當行入社會，窮實需要閣較多元、深入的推廣手路。

因為這个理念，「台文朗讀節」就按呢來發穎。

台文朗讀節提「掀開台文，講出台語，予台文成做日常」做概念，自冊起頭、以當年的台文書出版做中心，對創作者、推廣者開始，相接串聯，紡一幅針跤幼幼、敆痕峇峇的好紗。集倚親子、少年人，閣有對台語文有興趣的社會大眾，透由深入對談的論壇、文學氣味豐沛的朗讀，以及鬧熱的市仔，牽出逐家對台文的熱情。